Zer da Librezale?
Librezale euskara informatikaren munduan bultzatzea helburu duen lantalde irekia da. Librezalek ez dauka egitura finkorik, eta edozeinek har dezake parte nahi duen modura eta nahi duen denbora eskainiz. Librezalen parte hartu nahi izanez gero, begiratu gure webguneko Parte hartu nahi duzu? atala. Librezalen ez dago zuzendaritza talderik, ez dago bozeramalerik. Librezale taldea foro batera edo bestera gonbidatu badute, ezin da taldearen izenean inor joan, taldekideren bat joan daiteke, baina ez du talde osoa ordezkatuko.
Librezaleko kideak bat-bateko mezularitza euskarrien bidez komunikatzen dira, txat zerbitzuen bidez, (Matrix, Telegram), baina taldekideen komunikatzeko bide nagusia posta zerrenda bat da.
Aurrez aurreko batzarrak ere egiten dira. Esandakoak akta batean laburbiltzen dira eta hitz egindakoa publiko egiten da. Posta zerrendan idazten diren mezuak publikoak dira. Bestalde, badago librezale webgunean blog bat (Albisteak). Taldekideek badute non idatzi eta argitara eman 'software librea euskaraz' gaia edo inguruko gaiak jorratzen duten dibulgazio artikuluak.
Edukiak
Printzipioak
Jatorri eta ikuskera askotako lagunak ari gara Librezalen, baina denok ere oinarrizko printzipio batzuk jarraitzen ditugu (2020ko biltzarrean onartuak):
- Software librea eta euskara taldearen ardatzak dira, software mota hori gure izaerarekin bat datorrelako eta euskalgintzan laguntzen duelako.
- Taldearen autonomia bermatzea. Horretarako, diru-laguntzarik ez eskatzea (instituzio zein enpresa handienak) printzipioetako bat da, gure jarduna ez lotzea inoiz diru-laguntzei.
- Giza eskubideekiko konpromisoa (Europar Batasunaren Oinarrizko Eskubideen Gutuna), genero berdintasuna, inor ez diskriminatzea...
- Software librearen 4 askatasunak sustatzea:
- helburua edozein dela ere exekutatu ahal izatea,
- aztertu eta aldatu ahal izatea (horretarako beharrezkoa da kodea eskuratu ahal izatea)
- kopiatu ahal izatea
- hobetu, eta hobekuntza horiek publiko egin ahal izatea, komunitatearen onurarako.
- Orokorrean, IKT libreak bultzatzea: estandar irekiak (hardwarea, softwarea, protokoloak...), lizentzia libreak dituzten edukiak, burujabetza teknologikoa.
Librezale sarea
Printzipio hauekin bat datozen bi talde desberdin existitzen dira gaur egun: Librezale, 2003an sortua, eta Hezkuntzan Librezale (HeL), 2017an sortua. Talde bakoitzak bere biltzar propioa du, guztiz autonomoa da, izaera eta lehentasun desberdinak ditu, baina gorago azaldutako printzipioekin bat datoz biak.
Librezale talde orokorra, batez ere sormenarekin eta komunikazioarekin lotutako lanetan aritzen da: softwarea euskaratu edo horretan dabiltzan beste batzuk lagundu, informatikaz euskaraz hitz egingo duen komunitatea sortu, software librearen erabiltzaileok elkar lagundu, dokumentazioa sortu eta euskaratu, estandar irekien eta eduki libreen garapena sustatu eta abar.
Hezkuntzan Librezale (HeL) taldeak hezkuntzaren esparruan eragitea du lehentasun, euskal hezkuntza komunitateetan software librearen erabilera hedatzeko informazioa zabalduz, elkar lagunduz, tresnak probatuz, jardunaldiak antolatuz eta abar.
Historia
Librezale boluntario talde txiki batek sortu zuen 2003. urteko ekainean. Hasieran, Librezale punto org izan zen webgunearen helbidea eta 2015eko martxoan .eus domeinua erosi eta handik gutxira webgunea berriztatu eta Librezale.eus izatera pasatu zen. (Aurreko .org domeinua esku beltzek harrapatu zuten).
Informazio gehiago
Ikus, gainera
- Europar Batasunaren Oinarrizko Eskubideen Gutuna
- Euskarazko Wikipedia: "Formatu irekia".
- Euskarazko Wikipedia: "Software Librea Herri Administrazioan".
- Euskarazko Wikipedia: "Software Librea Hezkuntzan".
